|
Cd's |
Ech, ónger en baove
|
De leedjes vanne zèsde Echter Revue.
|
 De leedjes van dees viefdje revue cd tovere biej mich weer de sjitterendje bühnebeeldje van de
zèsde Echter Revue; Ech, ónger en baove op mien nètvlies. Complete choreografieën väör koar
dansgroep en acteurs. Prachtig oetgeleech en aangeklèdj mit väöl aug väör detail. Alles live gebrach, niks orkesbenj of covers. Nae; eige repertoire, zelf oetgeveurdj, zónger hulp van professionals van boete-aaf. Dét is volges mich de krach van de Echter Revue, alles väör en door eige, vriejwillige mitwèrkers.
Väör de opnames zeen weer oetgeweke nao de BestTrex Studio in Hooge Zwaluwe wo eigeniëre
Marcel Gerardts en Arno van Doorne ós es koar en orkes op ein gastvriej meneer höbbe weite te
stimulere. Hiëre bedanktj hiejväör!
Op dees cd höbbe weer geprobeerdj óm de livesfeer van de zèsde Revue zoaväöl mäögelijk te vange op ein cd. Zoa trökloesterendj is ós det good gelöktj.
Biej de toesjouwers die biej ein van de oetveuringe wore in april 2005 is dees cd ein fieës der
herkènning.
Eine glimlach en missjien hiej of dao ein träönke zoewe resultate kènne zeen van het beloestere
van dees cd.
Ein cd wo weer es bestuur van de Echter Revue bezunjjer gruëts op zeen.
Ein cd die de herinnering aan de zèsdje Echter revue tót in lengte van daag laevendj kèntj haoje.
Väöl loesterplezeer.
Henk Hover, leedjesmaker
|
|
|
| |
Teksten |
Ech, ónger en baove
|
|
|
|
|
(Echter Revuekoar en -orkes
teks/meziek: Henk Hover)
Alle ingrediënte staon hiej väör uch klaor.
d’r Is ein dènk det geer ós mótj belaove:
det geer gaontj genete, det geer uch ammezeertj
mit dees revue: Ech, ónger en baove.
Midde inne wèntjer woort d’r al gezaeg,
dees hal die, woor nog kaal.
Dao wore nog gein steul of gerdiene ‘t woor laeg,
in dit theater, oze zaal.
Dao woort geoefendj en gedach,
gevlooktj en auch, geprakkezeerdj,
gesjraptj gesjreve en gelachtj
en mit de bend gerepeteerdj.
Deze nuuje lente kèntj ein nuuj geluid.
Det knaltj weer, door dees zaal.
‘t Is weer tied väör humor gekoekaak en gekuit,
‘t is weer revue, den wètj geer ‘t waal.
Dao weurtj gespeeldj dao weurtj gedansj.
Dao klinktj gelach, en auch gezang.
Weer gaon uch noe ech ammezere.
Det geit ós lökke zeentj mer neet bang.
|
| |
|
(Johan Vergoossen & ‘t Echter Revuekoar en -orkes
teks/meziek: Henk Hover)
Doe bös mien eige zoebelzachte mupke
Ach kèndj waat haoj ich väöl van dich
Van ‘t puntje van die naeske
tot die zoebelzachte lupke
Van det kuulke in dien wengske
tot dae lach op dien gezich
Doew bös ‘t öpke väör mien zoebelzachte döpke
Ich verdrènk es ich in die auge kiek
De bubbelkes van de champagne
of de sókker in mien dröpke
Det ich trouwe mit dich gaon
maaktj mich de käöning te riek
Ich duuj mien wang taege dien zoebelzachte wengske
Kippevel es doe maedje nao mich lachs
Es se naeve mich zits, op oos favoriete benkske
Ich ein serenade zeng ónger dien vinster in de nach
Doe loks mich men mit dien zoebelzachte stömke
Esse langszaam die uigskes op mich richs
Edere keaerel stuit plots, in óngerbóks en hömke
Es t’r van ein meid wies dich al daen aandach krig
|
| |
|
(Peggy van de Ven & Evelien Smeets en ‘t Echter Revueorkes
teks: Henk Hover / meziek: Judith Hover)
Hej ich kènne weite, weite waat se dachs.
Waat se deep in dien hert éch van mich vónjs.
Gedachte die èns laefdjen, die hieël ónverwachs
zeen bedolve, in ein kis óngergrónjs.
Zote dien auge vol mit traone,
woort dien voes óm mich gebaldj?
Niks te zeen in dien auge.
Hej ich mer mit dich gekaldj.
Hej ich laote weite, waat ich van dich dach.
Nemes is dich lever es dien eige kèndj.
Hej ich biej tied van leave neet zoa lang gewach.
Ich stuur dich mien gedachte wiej ‘t wejje vanne wèndj.
Mien auge zote vol mit traone,
mien voeste dök óm dich gebaldj.
Niks mieë zeen mit mien auge.
Väöls te dök neet truukgekaldj.
De moderbandj is dök te kort
dus zeuks se ‘t gevech.
Blènd väör ein oetgestaoke handj
ónbereikbaar, te wuud weg.
|
| |
|
(Echter Revuekoar en -orkes
teks/meziek: Henk Hover)
‘t Is neet zoamer ein plestikke bekske
mit ein dekselke in ein kwante kluëer.
De vervanger väör ein sumpel bòtrammezekske.
‘t Is det sisse det ich biej ‘t toedoon gaer huëer.
‘t Is dae look in al zien eenvoud, toch zoa
superfunctioneel
en die oetgekiendje marketing, waaw susupercommercieel.
Gebroek ‘t väör slaaj paté of keukskes,
väör zoute stengels, pudding of väör chips.
Väör ‘t gebroek en väör alle mäögelijkhede
haet dien consulente vas nog tips.
Doe kèns ‘t vast dagelijks gebroeke.
Num dien lunch d’rin mit nao dien werk.
In ‘t aafwasmesjien nog klueërbestendig,
ónverwoesbaar en baeresterk.
|
| |
|
(Echter Revuekoar en -orkes
teks/meziek: Henk Hover)
Kiek, Ich höb dit nog gekrege van mien oma,
die hej ‘t weer ge-òrve van häör nich.
Waat ‘t väörstèltj is neet mekkelijk te zègke.
Es se zoa kiks is ‘t net ein saort van vergezich.
‘t Is zoa sjoan, ‘t is zoa sjoan,
väör mich ‘t allersjoanste op dees aerd.
‘t Is zoa sjoan, ‘t is zoa sjoan,
mieë es ein laeve lang wèrke waerd.
Kiek, Dit höb ich nog gekrege van mien moder
‘t stóng bie hun thoes auch al oppe sjouw.
In d’n oorlog toen haet opa ‘m begrave,
ómdet anges eine Pruus det dènk dök vènjje zou.
Kiek, Hie èns nao daen hanger,
dao höb ich auch nog oarebelle biej.
Mit dees broche is ‘t ein sjieke combinatie,
die droog mien paettant op häör trouweriej.
Det sjaemel sjilderieke of die vreselijke vaas,
wis d’r mer ‘ns emes waat de waerde waas.
Det sjaemel sjilderieke of die vreselijke vaas,
wis d’r mer ‘ns emes waat de wèrkelijke waerde waas.
|
| |
|
(Echter Revuekoar en -orkes
teks: Henk Hover / meziek: Judith & Henk Hover)
Het èndj vanne aovendj,
het èndj van het fieës,
het èndj van ein spannend verhaol.
Het èndj van ein leedje,
het èndj van ein weag,
ein èndj haet ‘t allemaol.
Want woor d’r gein èndj den ging het mer door.
Den sjèddje auch niks oats èns oet.
Mit ein èndj kömp d’r plaats väör ein nuuj begin.
Mit ein èndj köm se altied weer vroet.
Want al waat begintj, det sjeitj oats èns oet.
Ein zeuktoch die stoptj es g’r ‘t vèndj.
Wie langer het doertj, ‘t verlange det greutj,
‘t verlange nao ‘t verlossendje èndj.
Ein èndj is ein aafsjied, mer dök neet väör lang.
Besef jong doe höbs geine tied!
Doe rens tót ‘t ènj en blifs in de pas,
mer ‘t èndj van d’n draod, raak se kwiet.
|
|
| Credits:
Revuekoar:
Margaret Engelen, Hannie van Helvert, Frans Niessen, Evelien Smeets, Liesbeth van de Ven, Peggy van de Ven, Roel van de Ven
o.l.v. Judith Hover
Revueorkes:
gitaar: Henk Hover, drums: Sergije Kreso, bas: Marcel Gerardts, accordeon en toetsen: John Damen
© leedjes: Henk & Judith Hover
Audiotechniek, productie en mastering:
Marcel Gerardts, Arno van Doorne, BestTrex Studio Hooge Zwaluwe (NB)
Coördinatie
Henk Hover
CD-ontwerp
René Borghouts
Weer danke
Jan Welters, Wim Hover, Marcel Theunissen, Paul Niessen, Familie Smeets
|
|
|
|
|
|