Alle liedteksten uit de Echter Revue 2019
vanaf eind mei komen hier ook de geluidsbestanden te staan.
Circus Wunderbar
tekst Henk Hover | muziek Floortje Hover
Kómtj noe allemaol biejein
Kómtj noe allemaol ‘ns effe kieke
waat geer hie gaontj zeen, jao det is de meutje waerd
waat geer hie gaontj zeen is mit niks te vergelieke.
Dezen tróp koom vanoet de ganse waereld bie-elkaar
Kómtj uch vergape aan oos circus,
Circus Wunderbar
Acrobate zeentj geer danse op ’n kaord
danseresse, jao det zeen van die gezwankdje
ballerina’s op ein paerd, jao ’t is ech waor
weer brènge sfere woot geer altied haer verlangde
De marahadja oet ein wuud en werm landj
eur gedachte die hae zónger meutje leusj
en ouch d’n olifant noe maaktj uch ane kantj
geer höbtj gelök det oos circus Echt oet keusj
Alles inne gate
tekst Henk Hover | muziek Mike Roufs
Weer haoje alles inne gate
weer haoje alles in ’t oug
dao is niks waat hie gebäörtj
niks waat good is of neet doug
is d’r ruzie hiej? Jao den zeen weer det!
kömp vraemp volk väörbiej? Jao den zeen weer det!
Is de bekker laat? Jao den zeen weer det!
Is de buurman zaat? Jao den zeen weer det!
Jao waat zei dae kwastelaores,
jao waat vroog dae vraemdje vent?
mit zien stadse aangewuuendjes,
mit zien boetelands accent?
det weer zien uig zeen en zien oare
hae hèltj ós leefs neet inne tes
De straote zeen oos domicilie
Weer zeen juniordetectives mit ein gooj naas väör succes
jao waat bedach dae kwastelaores,
waat bedach dae vraemdje vent?
mit zien broengeroete pekske
mit zien stads raffinement?
det weer zien oare zeen en ouge
ziene v’roetgesjaove pos
Wee degene dae zich reurtj
zich verdach gedreug in Ech, dae gene is gans rap de klos
Flavia en Octavia
tekst Henk Hover | muziek Judith Hover
Ich kreeg mich sjus toch weer ein sjieke invitatie
väör ein extraordinair en exclusief evenement
inclusief ein tes mit heerlijke tractatie.
En wo is det den te doon det exclusief evenement?
neet óntsierdj door börgers, volksdevaluatie
de finefleur van oos saort luuj, dus neet ’t sjoem van de natie.
De luuj van Ech gaon zich te boete,
mit de loeke väör de roete
aan fieëste, bachanale in ’t geniep.
Waat god en kèrk haet aafgeraoje
pestoar oetdrökkelijk haet verbaoje,
doe wèts waat ich bedoel, doe kèns det tiep.
Mer äöverdaag niks ane handj
de netste minse van ’t landj.
Haor gekömp, bóks inne vaoj
de klèdjes inne ploaj.
Alle börgers van dit allerleefste stedje
zeen zoa netjes wie ’t huuertj, zoa godsvruchtig en decent
Ome Harie, Sjang de Sjoester en tant Betje
Ouch de adelijke dames en de hieëre zeen present
stieve kraag en ’t korsèt strang ingerege
’t is klatergoud waat blinktj
Van kèndjsaafaan mitgekrege
Lorelei
tekst Henk Hover | muziek Judith Hover
Ich zèng toane oet de tuppe vanne tene.
Ich raak ze ein väör ein, zuver zèngendj, mit gemaak.
Ich bön neet sjoe väör ein oktaaf of zès of zeve.
Es ich zèng vergaet ich alles, gaon ich duchtig oet mien daak.
Mien laeve vol van muzikale fascinatie
es ich druim druim ich van Mozart of Chopin.
Haoj dich in ach, ich veul de noate alweer struime.
Gaef mich ein toan hieër pianist, es ich op mien lieëgs begin.
Leefde is blèndj
tekst Henk Hover | muziek Paul Pelzer
Es se dènks aan waem dich leef haet
es se veuls waem óm dich geuf
es se huuers waem dich get leefs zaet
bös se in èns neet mieë bedreuf.
Bös se awd of óngelökkig,
bös se nuuezel wie ein kèndj?
Is de les die se mós lieëre:
leefde, leefde die is blèndj.
Leefde haet niks op mit wie se oet zuus,
Leefde, Leefde die maaktj blèndj.
Leefde, braekbaar delicaat en fien,
Leefde, Leefde die maaktj blèndj.
Leefde zuut gein kluuere of petroane,
Leefde, Leefde die maaktj blèndj.
Leefde, haet gaar niks op mit sjoane sjien,
Leefde, Leefde die maaktj blèndj.
Es se zuus waem mit dich mit veultj
es se zuus waem nao dich lachtj
es de zón bruk door de wolke
es dich ein bleumke weurt gebrach
bös se ozelig of einzaam
is gelök dich ónbekèndj
is waats doe väör noe mós weite:
Leefde , leefde die is blèndj
Kèrmis
tekst Henk Hover| muziek Judith & Henk Hover
’t Ganse jaor weer hel gewèrktj
de sjouwers die kóste ’t sjus drage
De baas dae heel dich aan ’t werk
Pestoar dae praekdje in de kèrk
En es se thoes woors ouch weer spoje, jage
Kèrmis, kèrmis fieës väör ederein
Kèrmis, kèrmis sjoan attracties op ’t plein
Kèrmis, kèrmis ‘t is fieës in de ganse stad
Efkes alle zörg vergaete, kèrmis is ein werm bad
De zörg van alledaag opzie
Zón fieës geit vreugdje väör ós brènge
Kóm drènk ein drenkske en bön blie
En dans ein denske op ein rie
Dus laot dich noe mer huuere es weer zènge
kèrmis doertj noats lang genóg
d’r hunk leefde inne loch (‘ch Bön ram Verkoch)
d’n Discotrein
tekst Henk Hover | muziek Judith Hover
Sprèng mer in d’n discotrein, d’n discotrein nao Ech
dae trein dae is ’t hieëlemaol, dae trein dae is te gek
Sprèng mer in d’n discotrein, d’n discotrein nao Ech
mit ein vaartje ritj daen trein nao Ech, aan disco’s gein gebrek
De haore in de permanent, miene coolste Jevvelin
Ich koup mich twiee retourtjes, väör mich en mien vriendin
ieës Stoba, den Majestic langs ’t Trepke rap nao Spee
The heat is on , ich maak de blits ich veul mich ram oké
och woor noe toch daen discotrein, dae discotrein eweg
de jäög die maak ’t väöls te bóntj, ’t is noe éch te gek
och woor noe toch daen discotrein, dae discotrein eweg
de börgemeister treutj neet op, aan pliessie is gebrek
Ze loupe mit zien hónderde, bie ós hie door de straot
Ze sjrieëve óm ’t helste, de jäög die hèltj gein maot
Ze piesse inne brevebös , ’t haet gaar geine aard
ze staon zich aaf te lebsje, hienaeve in de vaart
Bimbo d’n olifant
tekst Henk Hover | muziek Judith Hover
Bimbo miene olifant det is ein lekker deer
hèltj van knoevele en knuffele, van pinda’s en van beer.
Bimbo miene olifant dae is hertstikke leef
hèltj van kènjer en gebakjes, van dit leedje waat ich sjreef.
Bimbo miene knoemel haet niks kwaods in ziene zin,
Bimbo miene leve sjat doe bös mien hertsvriendin.
Doe bös mien hertsvriendin.
De dressuur van zónne Olifant
vèltj in principe hieël erg mit .
Väör ein keukske duit ze alles,
doon ich det den duit zie dit.
En es ze jóngk zeen zeen ze aaibaar,
mer ze greuje oppen doer.
En zeen ze groat , neet mieë te haoje,
gaon ze door ein steinse moer.
Drej, Rol, Zit…..
Dolend door d’n tied
tekst: Henk Hover | muziek: Henk Hover, Paul Pelzer, Mike Roufs
Dolend door d’n tied, en dwalendj langs de jaore
Zeen weer d’r dus al mit al, neet väöl slummer op gewore.
‘t Zeuke van ’t antjwaord, op ein väöls te vaag geheim
Levert stieëds mieë vraoge op, stieëds mieë vraoge op,
Levert stieëds mieë vraoge op. En hónderd is gein ein
Van alles waat se zuus is ein deil neet waat ’t is
Dènger zeen neet altied waat ze lieke
Minse zeen väöl mieë es allein de boetekantj
Doe kèns de luuj neet in ‘t köpke kieke
Stèls se dich de vraoge, bös se daag en nach op zeuk?
’t Antjwaord is te vènje in gein hónderddoezendj beuk.
Van zake dies se huuers is ein deil dök gaar neet waor
Waem kèns se hie nog óm de waorheid vraoge
‘t Hert ligk de luuj éch neet altied oppe tóng
Bliekbaar waere luuj gaer väörgelaoge
Stèls se dich de vraoge, bös se daag en nach op zeuk?
’t Antjwaord is te vènje in gein hónderddoezendj beuk