In Ech bön ich zoa gaer (nuuj Echs volksleed)
(tekst: Henk Hover muziek: Jip Hover)
Alles waat Ech haet, haet éch nemes anges
Dae sjtiel haet geine, nemes haet dae flair
Gein stad wo zoaväöl prach, meziek en zang is
Oh goje God , in Ech bön ich zoa gaer
Oh goje God , in Ech bön ich zoa gaer
‘t zeen dien straote dien steegskes en dien grachte
‘t magnifieke raodhoes oppe Plats
‘t Stedje greudje zoamer oet zien krachte
Och Amsterdam, doe wóls dets doe die hats
’t is dien klasse, diene sjtiel en dien finesse
Dien joie de vivre en dien speels raffinement
Biej dien charme en bie dien souplesse
Verbleiktj Paries es goodkoup amusement
Mario, Mario ,Mario van Montfort
Held van oos sjoan stedje klein
Mario, Mario, Mario van Montfort
Väör diene ieër zènge weer noe dit refrein
’t Sprookje van Ech (vertellerslied)
(tekst en muziek Rick Malewicz)
D’r woor èns ein stedje, det stedje woor Ech, d’n draod kwiet, mer ’t koom op z’n puuetjes terech. De inwoners gruuets en ’n tikkie eigewies, van arrogant en hautain wore zie ouch neet vies.
Nae die Echtenieëre höbbe ’t hoag in hun bol, ze showen hun cente, niks is hun te dol. Op ein daag koom d’r eine nuje burgemeister aan en die Echtenieëre wore gans in de waan
Van Mario van Mofert, ein vlogger gans beroemdj, in Ech en omstreke ja dae waerde toen gekaoze en drek op ein vootstök gezat,
en Mario woor ’t idool vanne stad
Aan aandach haw Mario Ech gein gebrek, want ’t nuuts det woor zelfs al bekèndj oppe Slek. De Echtenieëre deje gans good hun bès,
want goddelijke Mario, loos hun de lès..
Mer Mario wól mieë, en zoch n sjoan decor, mit ’t aanzeen van Gucci, Chanel en Dior. En alles waat lieëlik of stuuerendj kós zeen, mós weggestoptj waere en moch nemes zeen
Geboewe en straote, geluif ’t of neet, zèlfs minse die waerdje verbanne bie de vleet. Mer de inwoners hele vanne aandach in Ech en kaldje alles det waat krómp woor weer rech
Ze veuldje zich baeter den alles óm hun haer, droge Mario op henj, jao ze hawwe ‘m zoa gaer. Hae kós alles laote en doon waat hae wól, burgemeisterke spele deej hae väör de lol
’t sprookje van Ech det is gans haute couture, zelfs t sumpelste uitje det is nag te duur. En ederein kaldje nag van det eine dènk: Mario van Mofert oet de Echteling….
Marios sprookje dreigdje de spuigate oet te loupe… Tót op eine daag….
Gondelierslied
( tekst: Henk Hover muziek: Jip Hover)
De prachte van oos grachte die zeen óngekèndj
Terech,det e’dre Echtenieër zich hieël get mèntj
Oos oetgegrave grachte zitte Ech éch oppe kaart
De trots van oos klein stedje is ein gondelvaart
De trots van oos klein stedje is ein gondelvaart
Giethoorn is om te lache, mit zien boerebuuetjes
Venetië mit zien gondels sjaamtj zich doad
De Mokummers mit hun grachte
det zeen mer erm kluuetjes
In Ech veurs se prinsheerlijk
op oos grachte in eine boat
De prachte van oos grachte die zeen óngekèndj
Terech,det e’dre Echtenieër zich hieël get mèntj
Oos oetgegrave grachte zitte Ech éch oppe kaart
De trots van oos klein stedje is ein gondelvaart
De trots van oos klein stedje is ein gondelvaart
Mestreech nae det is prut, bah ein róndjvaart oppe Maos
Peries mit al zien brögke sjaamtj zich doad
De Rotterdamse have
Die is ‘t nog neet haos
In Ech veurs se prinsheerlijk
op oos grachte in eine boat
De prachte van oos grachte die zeen óngekèndj
Terech,det e’dre Echtenieër zich hieël get mèntj
Oos oetgegrave grachte zitte Ech éch oppe kaart
De trots van oos klein stedje is ein gondelvaart
De trots van oos klein stedje is ein gondelvaart
Museum van de Vrouw
(tekst Henk Hover muziek: Judith Hover )
Weer vrouwluuj höbbe power,
weer vrouwluuj die staon sterk,
weer höbbe gein probleme,
mit zwaor en smerig werk.
Weer verdene ein plaquette
Ein medalie aan ein touw.
gaef ós ein Mueum,
’t museum van de Vrouw.
Gaef ós ein Museum,
’t museum van de Vrouw.
Weer vrouwluuj zeen de bóm
weer make noe ein puntj
w’r staon väör vrouwluujzake,
det is ós dik gegundj.
Weer verdene ein plaquette
Ein medalie aan ein touw.
gaef ós ein Mueum,
’t museum van de Vrouw.
Gaef ós ein Mueum,
’t museum van de Vrouw.
Bridge: Weer vrouwluuj haoje same , de maedjes aan de mach
laote ós neet commandere, waat hets doe den gedach?
(instrumentaal couplet solo)
Kóm met hiej mit die plaquette
Die medalie aan ein touw
weer zeer gruuets op oos museum,
’t museum van de vrouw!
In de kelder is get oet
(tekst: Henk Hover muziek: Jip Hover)
In de kelder is get oet.
Dao is ummer get te doon.
Dao is ederein wie det ‘r gaer wiltj zeen.
In de kelder is get oet,
dans ich de zaole van mien sjoon.
Dao bön ich effekes michzelf,
dao hoof ’t neet zoa sjizofreen.
De slips moog aaf, ’t knuipke los,
want geine kèntj ós zeen.
Mascara draaf, weg luppegloss,
weer zeen wie det weer zeen.
Liflafjes en diëte, dao doon weer hiej neet aan
weg van alle dwang, zeen weer vrie en gaon weer draan.
’t Laeve is hie vol en vèt
weer lache ós hiej krank.
d’n Tied stuit stil, nog neet nao bèd,
de nachte zeen hie lank.
Mit Mario van Mofert höbbe weer niks oet te staon.
’t Is tied noe óm te fieëste, laot ós nao de kelder gaon!
Griep ’t laeve bie de kraag
(tekst: Henk Hover muziek: Jip Hover)
De alledaagse dènger en de zörg en ’t gezeur
Die koste dich verdoms väöl energie
Dao kris se slechte zin van die verpeste dien humeur
en den mós se in retrait of therapie
De zonziej van ’t laeve stuit noe in de sjeem
Zoogs se eerder volop kanse, zuus se noe éin groat probleem
Vier ’t laeve, plök d’n daag,
De toekomst is nog ver en vaag
Gister is al lang väörbiej
Noe is d’n tied en de plek is hiej
Hijs de vlag óm te viere,
stop mit zanike, zeure en kliere
griep ’t laeve, mit beidshènj bie de kraag
En laef vandaag, laef vandaag
Haol alles oet ’t laeve vier ’t väöl en vèt en hel
Want väörs se ’t wèts is ’t gedaon
De wiezers van de klok en de kalender gaon te snel
Ze tikke nao ’t ènj van dien bestaon
Dien wènse en dien planne die verdampe wie det geit
ónmerkbaar ingehaoldj door de saai realiteit
Vier ’t laeve, plök d’n daag,
De toekomst is nog ver en vaag
Gister is al lang väörbiej
Noe is d’n tied en de plek is hiej
Hijs de vlag óm te viere,
stop mit zanike, zeure en kliere
griep ’t laeve, mit beidshènj bie de kraag
En laef vandaag, laef vandaag
Pak diene kraom biej-ein
(tekst en muziek Henk Hover)
Zitj diene kop vol….
mit gezanik en gezeur
geis se verzoepe…
in dae alledaagse sleur
wètse door stress neet…
löp dich ’t water in de sjoon
den is det d’n hoogsten tied
óm dao get aan te doon
pak diene kraom biej-ein en maak dich rap op waeg
bewanjel óngebaandje pajer en en maak dien köpje laeg
pak diene kraom biej-ein en maak dich rap op waeg
bewanje óngebaandje pajer en maak dien köpke laeg
Höbs se de naas vol…
van ge-ummer en geklaag
verlangs se ’s mörges…
al nao ’t ènj van dezen daag
Höbs se de knuip aaf…
stuit dich ’t water in de sjoon
den is det d’n hoogsten tied
óm dao get aan te doon
pak diene kraom biej-ein en maak dich rap op waeg
bewanjel óngebaandje pajer en en maak dien köpje laeg
pak diene kraom biej-ein en maak dich rap op waeg
bewanjel óngebaandje pajer en maak dien köpke laeg
d’n Draod kwiet
(tekst: Henk Hover muziek: Jip Hover)
Zeuk in alle hoezer, bönne, boete, oppe straot
Want weer zeen ‘m kwiet, kwiet zeen weer d’n draod
Geine dae ós hulp mit advies of goje raod
weer zeuke nao de vaam , weer zeuke ozen draod
Zeuk in alle hoezer, boete oppe straot
Want weer zeen ‘m kwiet, kwiet zeen weer d’n draod
Geine dae ós hulp mit advies of gooje raod
Weer zeuke nao de vaam weer zeuke oze draod
Ligk d’r dök in Sjaelberg, oppe Slek of op ’t Hènge
Weer zeen daen draod al tieje kwiet, weer kènne ‘m neet vènje
‘ch höb äöveral gezóch
Eder steegske, eder sträötje
Mer wie Ich ouch mien bès deej
Geine vitzel van ein dräödje
Zeuk in alle hoezer, bönne, boete, oppe straot
Want weer zeen ‘m kwiet, kwiet zeen weer d’n draod
Geine dae ós hulp mit advies of goje raod
weer zeuke nao de vaam , weer zeuke ozen draod
Zeuk in alle hoezer, boete oppe straot
Want weer zeen ‘m kwiet, kwiet zeen weer d’n draod
Geine dae ós hulp mit advies of gooje raod
Weer zeuke nao de vaam weer zeuke oze draod
Ligk d’r dök in Sjaelberg, oppe Slek of op ’t Hènge
Weer zeen daen draod al tieje kwiet, weer kènne ‘m neet vènje
d’n Draod terech (slotlied)
(tekst: Henk Hover muziek: Jip Hover)
D’n draod dae is terech, gelökkig vónje weer d’n draod
Hae loog zoa väör het griepe, midde oppe straot
Weer sloge de advieze en de hulp en goje raod
Zoamer in de wèndj, weer barsjde oet de naod
Draod is terech, weer vónje weer d’n draod
Hae loog zoa väör het griepe, midde oppe straot
Weer sloge de advieze en de hulp en goje raod
Zoamer in de wèndj, weer barsjde oet de naod
Same mit gans Pej dus auch de Slek en auch ’t Hènge
Ós woor dae draod hieël effe kwiet, weer moogdjen ‘m weer vènje
Weer kómme weer tót inkieër
Niks mieë óm ós te sjame
Sjus wie eder sprookje
Veel oeteind’lijk alles same
D’n draod dae is terech, gelökkig vónje weer d’n draod
Hae loog zoa väör het griepe, midde oppe straot
Weer sloge de advieze en de hulp en goje raod
Zoamer in de wèndj, weer barsjde oet de naod
Draod is terech, weer vónje weer d’n draod
Hae loog zoa väör het griepe, midde oppe straot
Weer sloge de advieze en de hulp en goje raod
Zoamer in de wèndj, weer barsjde oet de naod
Same mit gans Pej dus auch de Slek en auch ’t Hènge
Ós woor dae draod hieël effe kwiet, weer moogdjen ‘m weer vènje